السلام عليكم

طبعا السالفة محد يدريبها لانها مستوية امس الصبح وللحين ما اعلنوا في الجرايد او انهم اعلنوا وانا ما انتبهت للخبر

السالفة وما فيها ، موظفة الامن ( السكيوريتي ) كان راحية للمكان اللي خصصوا لها فيه وهو مصرف

ابوظبي الاسلامي فرع الفجيرة فشافوها 3 شباب وسألوها وين رايحة قالت رايحة المصرف

فقالوا نحن من الجوازات و سألوها عن اقمتها فقالت لهم ان اقامتها على شركة الامن اللي في دبي

وهم عينوها في الفجيرة ومن حق الشركة توزع العاملين فيها في اي جهة تطلب الامن

المهم قالوا لها هذي مخالفة وانتي ما تقدرين تشتغلين الا في دبي وقالوا لها اركبي السيارة وهي

على بالها فعلا انهم من الجوازات وركبت ويتصلوا فيها من المصرف ، ليش تأخرتي قالت السالفة

فطرشوا واحد من الموظفين اللي في البنك للجوازات فقالوا لهم احنا ما طرشنا حد والمفتشين كلهم موجودين

في الادارة ، فقالوا بنسأل مركز المدينة وقالوا لهم نفس الكلام المهم واحد من المصرف شك في الموضوع

واتصل فيها مرة ثانية ردت عليه قالت انهم طالبين مبلغ المخالفة اللي هو عبارة عن 50 الف درهم

فقال الموظف اللي في المصرف 50 الف وايد نقصوا المبلغ قالوا بنشوف

ورجع واحد من المتهمين واتصل في المصرف من رقمه الخاص وقالهم احنا كلمنا مدير الجوازات

ونقص المبلغ الى 8000 درهم فقالهم اوكى بندفع 8000 درهم واتفقوا انهم يتلاقوا

عند برج الفجيرة و موظف المصرف طلع ذكي اتصل في التحريات وقالهم الموضوع وعقبها كلم المتهمين

وقالهم تعالوا عن محكمة الفجيرة وفعلا وصل الموظف لباب المحكمة وقالهم طبعا مواصفات سيارته

المهم وصل واحد من المتهمين ويدق الجامة يوم الموظف شاف المتهم انصدم

طلع الموظف يعرف المتهم زين زين وساكنين بنفس المنطقة ، المهم الموظف ما نزل الجامة

واتصل بالتحريات مرة ثانية قالهم انا عرفت الريال وما ابغي الريال يعرفني عشان ما يتعرضوا لي

في المستقبل ، المهم 3 دوريات من الشرطة والتحريات حاصروا المكان وتم القبض عليه

والمتهمين الباقيين شردوا من المكان بعد الضرب يابوهم كلهم ( كلهم مواطنين ) 2 اخوان و واحد ولد خالتهم


الجماعة خذوا البنت المسكينة واغتصبوها كلهم وبعدها ضربوها ضرب مبرح كادت ان تموت

ونزلوها خلف فندق كاليفورنيا بدمائها ، والحمدلله حصولها وودوها المستشفى

وخبرتهم القصة وثبت انهم مغتصبينها وضاربينها والمسكينة بعدها في المستشفى

و موظف المصرف طلع ذكي و استغربوا ضباط مركز المدينة من تصرفه ، وقالوا له

انت المفروض تشتغل في التحريات مب المصرف

والله الجرايم قاعده تزيد كل يوم الله يعيننا من المجرمين


المصدر هو موظف المصرف اللي كان بطل في يوم الامس